Butter Chicken & Lauk Bhaji

Það var smá indversk veisla hérna á Asparskógunum í gær og ég má til með að gefa ykkur tvær nýjar uppskriftir í indverska dálkinn. Þær eru Butter chicken og Onion Bhaji.

Butter chicken

Það er best að byrja á að hafa allt hráefnið tilbúið. Mæla kryddin, skera tómata, skera lauk, raspa engifer, pressa hvítlauk, mæla olíuna og mjólkina.

Þegar að þetta er allt saman klárt skaltu setja smjör og olíu á pönnu (1 msk smjör og 3 msk olía) og steikja laukinn. Það verður að steikja hann á lágum hita (ég hafði hellurna stillta á 4 af 9) í dágóðan tíma. Hugsa að þetta hafi tekið um 10 mínutur þar til hann varð mjúkur og örlítið gylltur.

Þá er engiferrót, hvítlauk,kóríander, chilli, túrmeriki og salti bætt við og hitinn hækkaður örlítið. Þetta er steikt í 1-2 mínútur eða þar til að lyktin verður svo dásamleg að þig langar til að fara að grenja úr hamingju

Þegar að krydd/lauk blandan er tilbúin bætiru við tómat og tómatpúrru og heldur áfram að steikja í nákvæmlega 1 mínútu í viðbót

Næst er kjúklingabitunum og mjólkinni hent í pottinn og öllu blandað vel saman. Þetta er látið malla í 10 mínútur sirca eða þar til kjúklingurinn er eldaður. Það fer að sjálfsögðu eftir því hversu stórir bitarnir eru hversu langann tíma þetta tekur svo það er um að gera að fylgjast með þessu.

Ef þú hefur nægann tíma þá er lang best að láta réttinn standa í pottinum í nokkra klukkutíma og rétt áður en þú berð hann fram er hann hitaður aftur, garam masala og cashwe hnetu paste i bætt samanvið og látið hitna (alls ekki sjóða). En ef þú ert að gera þetta í flýti þá seturu að sjálfsögðu kryddið og paste ið bara strax í.

Innkaupalisti fyrir Butter Chicken (fyrir 4 og afganga daginn eftir)

smjör
olía

1 kg kjúklingabringur
1 hótellaukur
1 tómatpúrra
1 meðalstór tómatur
2 hvítlauksrif
1 tsk röspuð engiferrót
2 tsk kóríander krydd
1,5 tsk chilli krydd
2 tsk garam masala
1 tsk turmeric
2 dl mjólk
4 tsk cashew hnetu paste (hneturnar látnar liggja í bleyti í 10 mín og svo maukaðar í matvinnsluvél)
salt og pipar eftir smekk
ferskur kóríander til skrauts

Lauk Bhaji

Ég byrjaði á að blanda hveiti, lyftidufti, chilli kryddi, turmeric, cumin og kóríander í skal og blandaði því saman. Næst bætti ég við 250 ml af vatni og hrærði saman.

Næst skar ég 1 hótellauk í strimla og hrærði saman við deigið

Laukarnir eru djúpsteiktir uppúr olíu (ég setti um 500 ml í lítinn pott og steikti lítið í einu og oftar því ég týmdi ekki meiri olíu í þetta)

Ég tók sirca eina msk af lauknum og setti varlega í pottinn þegar að olían var orðin mátulega heit (ég hafði helluna stillta á 6 af 9 og það var fullkomið hitastig) Laukurinn á það til að detta á botninn í pottinum svo það þarf að passa að losa hann eftir smá stund. Þetta er steikt í sirca mínútu eða þar til laukurinn verður fallega gylltur, þá er hann lagður á eldhúsbréf í svo borinn fram.

Það er unaður að strá smá salti og ferskum kóríander yfir áður en þetta er borið fram

Innkaupalisti fyrir Lauk Bhaji

1 hótellaukur
200 gr hveiti
1 tsk lyftiduft
1 tsk chilli krydd
1 tsk turmeric
1 tsk cumin
1 tsk kóríander krydd
salt
250 ml vatn
Ferskur kóríander til skrauts

Með þessu gerði ég svo grjón, raita sósu, naan brauð og uppáhalds kartöflurnar mínar. Allar uppskriftirnar finnur þú HÉR

* Eftir að ég flutti heim hef ég verið að venjast því að nota aftur íslenskt hráefni en maður var orðin ansi vanur þessu hollenska. Eftir að hafa prufað mig áfram hef ég komist að þeirri niðurstöðu að forsoðnu kartöflurnar frá Allra henta best í kartöfluréttinn. Það þarf bara að þurrka þær aðeins áður en maður steikir þær uppúr karrýolíunni.

Góða helgi

Emmý

Indverskur grjónagrautur

Ég bauð uppá grjónagraut með indversku twisti í kvöld og hann heppnaðist svo vel að hann kláraðist allur

Ég veit fátt betra en góðan grjónagraut, það hefur verið einn af mínum uppáhalds réttum síðan að ég var lítil og ég verð sérstaklega sjúk í hann þegar að kólnar í veðri. Þegar að ég áttaði mig á því að það var snjór úti var ekkert annað í boði en góður grjónagrautur í kvöldmatinn. 

Það eiga sér örugglega allir uppáhalds grjónagrauts uppskrift en ég lofa að þið verðið ekki fyrir vonbrigðum með þessa. Hún dugði akkúrat fyrir okkur fjölskylduna ( 2 fullorðnir og 1 dreki)
Í hana þarf:

3 dl grjón
6 dl vatn
6 dl mjólk
1,5 dl rjóma
2 msk sykur
1 vanillustöng
1 tsk kardimommur
smá salt
rúsínur

Byrjað er á að setja grjónin, smá salt og vatnið í pott og láta suðuna koma upp. Lykillinn að góðum grjónagraut (að mínu mati) er að gefa sér tíma í hann og elda hann frekar á vægum hita. Þessvegna hrærði ég sérstaklega vel í þessum og leyfði honum að malla í vatninu og saltinu þar til vatnið var orðið mjög lítið í pottinum, þá bætti ég við 2 dl af mjólk og lét hann malla áfram, ég gerði þetta semsagt þrisvar sinnum. þ.e lét hann verða mjög þykkann og bætti þá við 2 dl af mjólk.

Þetta er sirca þykktin sem ég leitaðist eftir áður en ég bætti við mjólk

Þá blandaði ég saman sykri, vanillu og kardimommu í skál og setti til hliðar

Þegar að mjólkin var búin og grauturinn orðinn vel þykkur setti ég rúsínur (algert smekksatriði hversu mikið), vanillu, sykur og kardimommur við grautinn og hrærði aðeins. Bætti þá við rjómanum og hækkaði aðeins undir honum og lét hann malla þar til hann varð aftur þykkur.

Mæli með að prufa þennan, hann var alveg mátulega sætur fannst mér en það er eflaust hægt að strá smá kanilsykri yfir hann. Mér finnst hann svo bestur með ískaldri mjólk og lifrapylsu on the side.

Emmý

Crispy Indverskur kjúklingur

Í kvöld eldaði ég brakandi stökkan Indverskan kjúkling sem heppnaðist vel, allaveganna svo vel að ég ætla að blogga um hann. Ég eldaði fyrir 5 fullorðna og 4 börn, og notaði u.þ.b. 1,2 kg af kjúkling

Ég byrjaði á að skera kjúklingabringurnar í þrjá bita og búa til jógúrt marineríngu, í hana fór:

1 dós grísk jógúrt (350gr)

2 egg

2 msk mjólk

1 raspað hvítlauksrif

1-2 cm fersk röspuð engiferrót

3 tsk soja sósa

2 tsk Cumin (ath ekki kúmen)

1 tsk Garam Masala

salt og pipar eftir smekk

Svona leit marineringin út, temmilega þykk

Þessu var öllu blandað ljúflega saman og það er fínt að láta kjúklinginn liggja í þessu á meðan að restin er græjuð

Næst á dagskrá er að raða upp 10 brauðsneiðum á plötu og grilla í ofni þar til þær verða gylltar og harðar, þær eru svo látnar kólna og að lokum muldar í matvinnsluvél. Ég blandaði 1 tsk af lauksalti og 1 tsk af hvítlauks pipar við blönduna en það er um að gera að krydda eftir smekk. 

Ég eldaði heima hjá pabba og hann á mjög svo myndarleg kartöflugrös í garðinum. Við tókum að sjálfsögðu upp nýjar kartöflur til að nota með kjúklingnum. Það er náttúrulega smekksatriði hvað fólk vill mikið af kartöflum en ég geri alltaf alltaf alltaf of mikið af kartöflum, þetta er einhver veikleiki sem ég hef erft frá mömmu (og hún frá afa) þannig að ég ætla ekki að gefa upp hvað ég gerði mikið af kartöflum:)

Beautiful

Lang bestu kartöflurnar

Kartöflur

x mikið magn af kartöflum

2 brokkolíhausar

1 chilli (smekksatriði)

2 hvítlauksrif

Ég sauð þær þar til þær urðu mjúkar, þá þurrkaði ég þær og lét kólna aðeins. Næst skar ég niður chilli, mjöööög smátt og raspaði 2 hvítlauksrif útí pönnu með mikið af olíu á. Það lét ég malla í eina mínútu á mjög vægum hita og skar á meðan niður tvo brokkolí hausa. Þeim var svo bætt við chilli/hvítlauksolíuna og látið eldast á vægum hita í 25 mínútur eða þar til brokkolíið varð mjúkt. Næs skar ég kartöflurnar í báta og bætti þeim við brokkolíið og lét hitna

Guðdómlegt chilli af chilli plöntunni hennar mömmu

Á meðan að brauðið var í ofni og að kólna gerði ég Raita sósuna mína sem ég hef ekkert breytt því mér finnst hún unaðslega, uppskriftina má finna HÉR, hún er svo geymd inní ísskáp þar til hún er borin fram.

Kjúklingnum er svo velt uppúr brauðmylsnunum (einn biti í einu), steikt uppúr nóg af smjöri (nokkrar mínútur hvor hlið) eða þar til að skorpan verður fallega gyllt. Bitunum er svo raðað í eldfast mót (sem er smurt með olíu) og látið vera inní 190°c heitum ofni á blæstri í sirca 20 mínútur.. Það er gott að taka einn bita úr og skera í miðjuna til að fylgjast með..

Búið að velta honum uppúr marineríngu og brauðmylnsnum

Steiktur

Kominn úr ofninum

Þetta var svo borið fram með rjúkandi heitu Naan brauði og góðu rauðvíni

xox

Emmý

Indversk veisla

Það var maraþon eldamennska hjá okkur Mömmu og Brilla á Burgemeester í gær. Eyddum dágóðum part af deginum (öllum deginum) í eldhúsinu og buðum svo uppá eðal indverska Þrettánda veislu (er ekki annars þrettándinn haldinn hátíðlega 7.jan á Indlandi?)

Boðið var uppá samtals 10 uppskriftir og þó ég segi sjálf frá þá voru þær mjög góðar. Þetta eru allt frekar stórar uppskriftir. Það voru 7 fullorðnir og 2 börn í mat og við pössum alltaf uppá að elda það mikið að við getum borðað þetta í tvö daga (flest allt er nefninlega ekki síðra daginn eftir).

Þetta verður líklegast mitt lengsta blogg hingað til en ég vona að þið hafið gagn og gaman af

Frumburðurinn búin að setja á sig svuntu með íslenska skjaldamerkinu og klár í eldamennskuna

Brilli tók Den Haag djamm á föstudaginn og var heilsan eftir því á laugardeginum. Hún svaf af sér mest alla eldamennsku en mætti fersk í mojito gerð um fimm leytið. Brilli klikkar aldrei

Tikka Masala

3 hvítlauks rif

2 rauðlaukar

3 papríkur (allir litir)

3 tómatar

2-3 cm engiferrót

1/2 rauður chilli pipar

1 kg kjúklingabringur

250 ml Tikka Masala Indian Curry paste

400 ml mjólk

200 ml hrein jógúrt

1. Skera niður allt grænmetið og kjúklinginn í bita (skárum hverja bringu í sirca 10 bita)

2. chilli, hvítlaukur og rauðlaukur steiktur uppúr olíu á wok pönnu (eða í potti) þangað til að laukurinn varð mjúkur

3. Restinni af grænmetinu bætt útí ásamt dassi af soja sósu. Látið malla í sirca 5 mínútur

4. Kjúklingabitum bætt við og látið malla þar til kjúklingurinn hefur lokast

5. Tikka Masala paste blandað saman við

6. Mjólk bætt útí og allt saman látið malla í 15 mínútur

7. Hreint júgúrt sett útí og látið malla í 5 mínútur

8. Skreytt með ferskum kóríander áður en þetta er borið fram

Svona leit grænmetið út skorið og svo steikt

Gúrme kjúklingaréttur sem er alls ekki verri daginn eftir

Indverskar kjötbollur

Mamma og Dísa gerðu Indverskar kjötbollur daginn áður og ég get hiklaust mælt með þeim. Þessi uppskrift er fyrir 1.kg af hakki og það eru sirca 40 bollur í golfkúlu stærð.

1 kg hakk

2 stórir rauðlaukar

3 hvítlauks rif

1/2 rauður chilli pipar

1 lúka ferskt kóríander

2 cm engiferrót (röspuð)

2 egg

1dl hot tómatssósa

4 grófar brauðsneiðar

2 tsk karrý

1 tsk garam masala

1 tsk kóríander duft

1 tsk papríku krydd

1 tsk turmeric

3 tsk cumin

salt og pipar eftir smekk

1. Laukur, hvítlaukur, chilli, kóríander og engifer sett í mixer og allt maukað

2. Brauðsneiðar (betra að hafa þær þurkaðar) settar í blandara

3. Öllu hráefni blandað í stóra skál og mixað mjög vel saman með höndunum

4. Bollur mótaðar (golfkúlustærð)

5. Settar inní ofn á bökunarpappír í 20 mínútur við 200°c

Kókos/Hnetu sósa

Þessa sósu höfum við alltaf með kjötbollunum og hún vekur alltaf lukku

1 1/2 msk karrýmauk (red curry paste)

2-3 cm engiferrót (röspuð)

7 tómatar (skornir í teninga)

1 dós kókosmjólk

3 tsk púðursykur

1 dl cashew hnetur (saxaðar með töfrasprota)

1. Karrýmauk og engiferrót hitað á pönnu í sirca 2 mínútur

2. Tómötum bætt við og látið malla í sirca 4 mínútur

3. Hella kókosmjólk útí og blandan er látin sjóða í 5 mínútur (hræra reglulega í)

4. Bæta kjötbollum útí og sjóða í 15-20 mín

5. Púðursykri og hnetum er svo bætt við í lokin og hrært vel í

Indversk ýsa

800 gr ýsa

1 tsk chilli krydd

1/2 tsk pipar

1/2 tsk salt

3 tsk turmeric

1 tsk karrý

2 tsk kóríander duft

3 msk ferkskur kóríander (saxað)

1 1/2 bolli Gram Flour

1 rautt chilli (saxað)

1 1/2 bolli vatn

3 msk brauðmylnsa (sirca 2 brauðsneiðar)

1. Skera fisk í bita og nudda honum uppúr turmeric kryddi og salti. Láta marinerast í 20 mínútur

2. Setja restina af hráefninu í skál og hræra vel. Þá á þetta að vera aðeins þynnra en orly deig. Gætuð þurft örlítið meira Gram Flour eða vatn.

3. Djúpsteikið í sirca 4-5 mínútur og leggið á eldhúspappír

Með fiskinum bárum við delicious mangó sósu sem við prufuðum í fyrsta skipti og hún verður örugglega prófuð aftur 

Mangó sósa

2 msk safi úr lime

2 hvítlauks rif

1 þroskað mangó

1 dl hrein jógúrt

1 tsk rifinn engiferrót

1. Allt saman sett í mixer og blandað vel

2. Til að þykkja sósuna, stappa saman við einni dós af sýrðum rjóma

Kartöflurnar hennar Svöbbu

Þessa uppskrift fékk mamma frá Svöbbu vinkonu sinni fyrir 12 árum og ég hef ekki tölu á hversu oft hún hefur verið búin til síðan þá. Einföld og ógeðslega góð.

 

500 gr kartöflur (forsoðnar) eða skornar í teninga

5 tsk karrý

300 ml kotasæla

3 msk sweet mango chutney

1. Setja olíu á pönnu og bæta karrýinu við, blanda vel

2. Steikja kartöflur uppúr olíunni þar til þær verða stökkar að utan

3. kotasælu og mango chutney blandað saman í eldfast mót

4. Kartöflunum blandað saman við

5. Hitað í ofni á 180°c í sirca 20 mín

Við prufuðum að gera kartöflu klatta í fyrsta skipti og þeir heppnuðust mjög vel. 

Aloo Masala klattar ala Burgemeester

500 gr kartöflur

1 rauðlaukur (mjög smátt skorinn)

1 lúka ferskur kóríander (saxaður)

1 tsk salt, 1 tsk pipar

1/2 bolli sýrður rjómi 

2 hvítlauks rif (pressuð)

1/2 tsk red curry paste

3 tsk hveiti

1 tsk kóríander duft

1 tsk karrý

sesamfræ

1. Sjóða kartöflur, kæla og mauka

2. Hræra saman sýrðan rjóma, red curry paste og hvítlauk og setja afsíðis

3. Blanda öllu hráefni saman í skál ásamt sýrða rjóma blöndunni og hræra vel saman

4. Búa til rúllu úr deiginu og skera í sirca 10-12 bita

5. Móta klatta úr hverjum bita og velta uppúr sesamfræjum

6. Steikja klattana á pönnu í nokkrar mínútur á hvorri hlið

7. Setja nokkra dropa af sweet mango chutney á hvern bita áður en borið er fram

Hnetu salsa

Þetta salsa/salat er ótrúlega ferskt og passar vel með öllum réttunum.

100 gr saltaðar cashew hnetur

125 gr saltaðar jarðhnetur

1 saxaður rauðlaukur

1 stór saxaður tómatur

1/2 rautt chilli, saxað

2 msk smátt saxað ferskt kóríander

safi úr tæplega 1/2 sítrónu

3 msk sweet mango chutney

salt

Allt sett í skál og blandað vel saman.

Fyllt egg

Þessi réttur er algjörlega ómissandi ef þú ætlar að halda indverska veislu.

10 harðsoðin, köld egg

2 msk majones

2 msk sweet mango chutney

1/2 tsk dion sinnep

1 tsk karrý

salt og pipar eftir smekk

Rauð papríka, söxuð

Möndlur, saxaðar

1. Harðsoðnu eggin skorin til helminga og rauðan tekin úr og sett í skál

2. Raða hvítunni í fat/bakka

3. Hræra saman restinni af hráefninu með töfrasprota eða í blandara.

4. Krydda með salti og pipar eftir smekk

5. Eggin fyllt með blöndunni, rúmlega 1 tsk í hvert egg

6. Rauðu papríkunni og möndlunum stráð yfir

Heimagert Naan brauð með hvítlauk og kóríander

Þessi uppskrift gerir 8 naan brauð.

500 gr hveiti

3 tsk sykur

2 tsk salt

1 tsk lyftiduft

220 ml mjólk

4 msk olía

1 lúka ferskur kóríander

2 hvítlauksrif (söxuð)

1. Þurrefnin siktuð í skál

2. Mjólkin og olían hrærð saman

3. Blanda saman þurrefnum og vökvanum og hræra

4. Gætir þurft að bæta við meira hveiti til að fá gott deig

5.Hnoðar deigið

6. Deigið sett í skál með volgu viskustykki yfir og látið bíða í 20 mín

7. Gerið pylsu úr deiginu og skiptið því í 8 bita

8. Mótar brauðin og setur þau á bökunarpappír

9. Hitar brauðin í grill ofni (250°c), 5 mínútur á hvorri hlið 

10. Blandar saman 4 msk af olíu, hvítlauknum og kóriandernum (betra að láta standa í smá tíma)

11. Penslar brauðin þegar að þau koma úr ofninum með olíunni

Raita Sósa

Raita sósan fullkomnar svo veisluna og er lang best útá grjónin.

4 dl hrein jógúrt

1/2 gúrka (mjög smátt skorin)

1 rauðlaukur (mjög smátt skorin)

cayenne pipar á hnífsoddi

1 msk sykur

Öllu blandað í skál og gott að láta hana standa í kæli í nokkra tíma áður en hún er borin fram

Borðið klárt

Góðir gestir í mat

Ásthildur kom svo með frábæran desert. Hvítt súkkulaði múss með grísku jógúrti og jarðaberjum

xox

Emmý