Súkkulaði & Bláberja cupcake með Ananaskremi

September mættur og eflaust margir sem fara í berjamó. Það er því miður eitthvað lítið um bláber hérna á suðvestur horninu en mamma er á leiðinni Norður og ætlar að týna í fyrstikistuna. Ég átti frosin ber inní skáp og ákvað að prufa nýja uppskrift, hún kom skemmtilega á óvart. Haust kaka með sumarlegu kremi.

Ég ætla líka að kynna ykkur fyrir dóttur minni, hún heitir Kitchenaid, hún er hrímhvít með mattri glerskál og við Bjarki fengum hana í brúðargjöf, hversu ótrúlega falleg er hún???

Í kökuna fer eftirfarandi:

- 1/4 bolli kakó

- 1/4 bolli soðið vatn

- 1 bolli hveiti

- 1/2 tsk matarsódi

- 1/2 tsk lyftiduft

- 113 gr smjör

- 1 bolli sykur

- 2 egg

- vanilludropar

- 1/2 bolli mjólk

- 1 bolli bláber (fersk eða frosin)

AÐFERÐ
- Soðið vatn og kakó sett saman í skál og hrært þar til það eru engir kekkir

- Sykur og smjör hrært saman þar til það er rétt og ljóst
- hveiti, lyftiduft og matarsódi hrært saman í sér skál
- Þegar að smjör og sykurblandan er orðin ljós og aðeins "fluffy" er eggjum bætt við einu í einu, þá kakóblöndunni og vanilludropum
- Þá er hveitiblöndunni og mjólkinni hrært saman við
- Ég velti svo bláberjunum uppúr hveiti og hrærði þeim svo saman við herlegheitin.

Kökurnar bakaði ég í 175°c heitum ofni í 20 mínútur en það fer eftir ofnum.

Ég útbjó líka þurrkaðan ananas til að nota sem skraut

Það var lítið mál, ég skar hann eins þunnt og ég gat, setti hann í cupcake form og inní 200°c heitann ofn. Hann var líklegast inni í 15 mínútur, þegar að ég tók hann út setti ég hann á eldhúsbréf og lét hann þorna.

Ég skar svo restina af ananasnum og setti í blandarann

Þessa græju fengum við líka í brúðargjöf og hún er dáááásamleg

Ég hakkaði ananasinn og notaði svo nælonsokk til að sigta safann frá, geymdi hann í skál og útbjó kremið. Í það fór

- 100 gr smjör
- um 200 gr af flórsykri en það fer eftir þykkinni á kreminu
- 50 ml af hreinum ananas safa (þetta fer líka eftir þykkt og smekk)

Þetta fór allt saman í hrærivélina og ég hrærði þetta saman í nokkrar mínútur eða þar til að kremið varð mjög létt og ljóst.

Kökunum var svo raðað á þennan fallega kökustand sem við fengum einnig í brúðargjöf (já við fengum óteljandi fallega hluti)

Mæli með þessum

Súkkulaði Chili Cupcakes

Þetta er kannski ekki hefðbundin bollakaka en boy ó boy hún er góð. syndsamlega góð eiginlega. Hérna er skvísan

Í þessa uppskrift fer:

175 gr hveiti
140 gr púðursykur
1 tsk lyftiduft
1/2 tsk matarsódi
2 msk kakó
100 gr brætt dökkt súkkulaði
1 chilli
2 egg
150 ml olía

50 ml mjólk

Byrjaði á að kveikja á ofninum. Ég hafði hann stilltann á 180°c og blandaði svo þurrefnum (mínus púðursykur) saman í skál

Ég prufaði ný cupcake form frá Wilton sem að ég mæli hiklaust með. Þau halda litnum eftir að kökurnar koma úr ofninum sem að venjulegu Wilton formin gera ekki.

Svona eru þau að innan, brill.

Næst á dagskrá var að þeyta saman púðursykri og eggjum. Ég þeytti í nokkrar mínútur eða þar til að blandan varð töluvert ljósari en í byrjun og silkimjúk

Næst hrærði ég mjöööög rólega saman við 150 ml af olíu

Nú er gott að bræða súkkulaðið (mér finnst þægilegast að gera það í örbygljuofni, í þetta skiptið notaði ég dökkan hjúp frá Bónus)

Eftir að olíunni er blandað saman við fylgir súkkulaðið fast á eftir.

Þá skar ég eitt chili mjög smátt og blandaði saman við ásamt þurrefnum og mjólk. þetta hrærði ég bara rólega.

Bakaði svo í sirca 15 mínútur en það er um að gera að fylgjast vel með þeim því það er misjafn eftir ofnum hversu langan tíma þetta tekur.

Á meðan að kökurnar bökuðust útbjó ég kremið og ég mæli með því. Í það fer:

60 gr smjör
100 gr sýrður rjómi (18%)
150 gr súkkulaðihjúpur
flórsykur og vanilludropar eftir smekk

Byrjað er að bræða súkkulaði og smjör yfir vatnsbaði

Sýrða rjómanum er næst bætt við og hrært hraustlega í þessu. Það tekur smá tíma fyrir þetta að blandast saman svo ekki örvænta ef að þetta er nokkuð kekkótt fyrst um sinn.

Þá er flórsykri og vanilludropum er svo bætt við og það fer eftir smekk hversu mikið þú villt hafa, því meiri flórsykur því þykkara krem.

Komnar úr ofninum og látnar kólna alveg

Þegar að við fórum í Húsafell um daginn stoppuðum við á Kleppjárnsreykjum og ég keypti þessa dýrindis chilli/papríku sultu

Ég fyllti kökurnar með smá sultu (notaði allt í allt 2 msk) í þetta verk notaði ég Wilton stút númer 230

Svo fór kremið á og chilli til skrauts 

Emmý

Nektarínu og Mango chutney cupcakes

Það getur verið gaman að nýta það sem er til í ískápnum í bakstur, oft verða bestu uppskriftirnar til þegar að maður leyfir hugmyndafluginu að ráða en fyrr í mánuðinum gerði ég akkúrat það og til urðu þessar cupcakes. Ég ætla ekki að gerast svo djörf að segja að þetta séu bestu bollakökur sem ég hef gert en mér fannst þær virkilega góðar. í þær fór eftirfarandi:

110 gr smjör eða smjörlíki

200 gr sykur

2 egg

250 gr hveiti

1 tsk lyftiduft

vanilludropar

3 tsk mango chutney (ég nota ekki bitana, bara sultuna)

2 nektarínur

sítrónusafi

smá sykur

1 dl mjólk

1. skera niður nektarínur í litla bita, kreysta smá sítrónusafa og strá 1 tsk af sykri yfir þær, blanda saman og láta standa í smá stund í sér skál

2. Þeyta saman smjör og sykur

3. bæta við einu eggi í einu og hræra vel, þar til blandan verður létt og ljós

4. blanda saman hveiti og lyftidufti í aðra skál

5. hella helming af hveitiblöndu og mjólk útí og hræra 

6. hella restinni af hveiti, mjólk og mango chutney útí, hræra þar til allt hefur blandast saman (alls ekki hræra of lengi)

Þá setti ég rúmlega eina tsk sirca af deigi í hvert cupcake form, ég notaði svo puttana til að mynda smá skál úr deiginu (nauðsynlegt að hafa skál með vatni til að bleyta puttana í). Ég fyllti svo "skálina" með nektarínu blöndu (rúmlega 1 tsk) og setti svo aftur eina tsk af deigi yfir blönduna

skálin klár

búið að fylla

Þetta fór inní 180°c heitann ofn í sirca 15-20 mín.

Á þessar skvísur setti ég svo uppáhalds kremið mitt, þetta HÉR

Svona leit kakan svo út áður en ég setti á hana krem og skar hana, fullkomlega gullinbrún.

xox

Emmý

Gulróta cupcakes með rjómaosta-engifer kremi

Ég hef verið löt við að baka undanfarið, aðalega vegna þess að ég er upptekin við að sinna drekanum mínum og mauka ofaní hann allskonar gúrme, en í dag tók ég mér pásu frá gufusuðu og töfrasprotanum og bakaði cupcakes!

Ég eeeeelska góðar gulrótakökur og hef lengi ætlað mér að gera cupcakes útgáfu af svoleiðis og lét loksins verða af því. Í kökurnar fór eftirfarandi:

- 175 gr hveiti

- 1 tsk lyftiduft

- 1/4 tsk salt

- 1/4 tsk matarsódi

- 1 task kanill

- 1 tsk múskat

- 140 gr sykur

- 1 vanillstöng

- sirca 250 gr af gulrótum

- börkur af einni appelsínu

- 4 msk ferskur appelsínusafi

- 2 egg

- 150 ml olía

Aðferð

Ég byrjaði á að kveikja á ofninum, ég hafði hann 190°c heitann. Næst raspaði ég gulræturnar og börkinn af appelsínunni, 

yfir þetta helti ég sirca 4 msk af ferskum appelsínusafa

Næst setti ég öll þurrefnin í skál

Ég þeytti svo eggin í nokkrar mínútur og bætti olíunni hægt og rólega við á meðan

Síðan bætti ég þurrefninu við eggja/olíu blönduna og hrærði öllu vel saman, að lokum bætti ég svo gulrótunum og appelsínuberkinum við

Ég nota alltaf þessa ískeið til að setja í cupcakes formin og mér finnst hún frábær

Þetta bakaði ég svo í sirca 14 mínútur en það er um að gera að fylgjast bara með þeim, þær urðu ljósbrúnar og fínar, það tekur mislangann tíma eftir ofnum

Á meðan að kökurnar voru í ofninum fékk drekinn minn avókadó með smá brjóstamjólk útí, það er í miklu uppáhaldi (ásamt flest öðru sem ég gef honum)

Áhugasamur

Þetta bros...

Ég hef verið dugleg að mauka fyrir hann allskonar grænmeti, aldrei að vita nema að maður skelli í barnamats bloggfærslu á næstunni??? 

Ég gerði svo krem fyrir kökurnar í það fór:

- 100 gr rjómaostur
- 100 gr smjör
- röspuð engiferrót
- vanilludropar
- flórsykur

Ég þeytti rjómaostinn og smjörið saman þar til að blandan varð ljós, þá raspaði ég engifer, líklegast í kringum 2 cm en smakkið ykkur til... Svo bætti ég við flórsykri, hugsa í kringum 300 gr eða þar til að þetta varð hæfilega þykkt og hæfilega sætt!

Svona var lokaútkoman

xox

Emmý