Indverskur grjónagrautur

Ég bauð uppá grjónagraut með indversku twisti í kvöld og hann heppnaðist svo vel að hann kláraðist allur

Ég veit fátt betra en góðan grjónagraut, það hefur verið einn af mínum uppáhalds réttum síðan að ég var lítil og ég verð sérstaklega sjúk í hann þegar að kólnar í veðri. Þegar að ég áttaði mig á því að það var snjór úti var ekkert annað í boði en góður grjónagrautur í kvöldmatinn. 

Það eiga sér örugglega allir uppáhalds grjónagrauts uppskrift en ég lofa að þið verðið ekki fyrir vonbrigðum með þessa. Hún dugði akkúrat fyrir okkur fjölskylduna ( 2 fullorðnir og 1 dreki)
Í hana þarf:

3 dl grjón
6 dl vatn
6 dl mjólk
1,5 dl rjóma
2 msk sykur
1 vanillustöng
1 tsk kardimommur
smá salt
rúsínur

Byrjað er á að setja grjónin, smá salt og vatnið í pott og láta suðuna koma upp. Lykillinn að góðum grjónagraut (að mínu mati) er að gefa sér tíma í hann og elda hann frekar á vægum hita. Þessvegna hrærði ég sérstaklega vel í þessum og leyfði honum að malla í vatninu og saltinu þar til vatnið var orðið mjög lítið í pottinum, þá bætti ég við 2 dl af mjólk og lét hann malla áfram, ég gerði þetta semsagt þrisvar sinnum. þ.e lét hann verða mjög þykkann og bætti þá við 2 dl af mjólk.

Þetta er sirca þykktin sem ég leitaðist eftir áður en ég bætti við mjólk

Þá blandaði ég saman sykri, vanillu og kardimommu í skál og setti til hliðar

Þegar að mjólkin var búin og grauturinn orðinn vel þykkur setti ég rúsínur (algert smekksatriði hversu mikið), vanillu, sykur og kardimommur við grautinn og hrærði aðeins. Bætti þá við rjómanum og hækkaði aðeins undir honum og lét hann malla þar til hann varð aftur þykkur.

Mæli með að prufa þennan, hann var alveg mátulega sætur fannst mér en það er eflaust hægt að strá smá kanilsykri yfir hann. Mér finnst hann svo bestur með ískaldri mjólk og lifrapylsu on the side.

Emmý

Snúður

Ég byrjaði á því að nota heilhveiti í þessa snúða uppskrift (alltaf að prufa eitthvað nýtt sjáið til) en það gekk semsagt ekki, það deig endaði í ruslinu þannig að ég byrjaði uppá nýtt. Þið megið experimenta að vild með þessa uppskrift en ég bið ykkur um að nota venjulegt hveiti (örugglega hægt að nota fínt spelt líka). En þetta er allaveganna afrakstur dagsins:

Ég skoðaði heilann helling af uppskriftum á netinu og endaði svo á að gera þessa. Hún heppnaðist ótrúlega vel og var svona heldur stærri en ég gerði ráð fyrir (örugglega 30 snúðar). Í hana fór eftirfarandi:

800 gr hveiti

2 pakkar þurrger

100 gr hrásykur

2 tsk lyftiduft

2 1/2 dl mjólk

200 gr ósaltað smjör

1 dl vatn

vanilludropar

Aðferð:

1. Smjör, mjólk, vatn og vanilludropar hitað í potti þar til smjörið er bráðnað

2. Öll þurrefni sett í skál og blandað saman

3. Smjör/mjólkur/vatns/vanilludropa blöndunni blandað saman við þurrefnin og deigið hnoðað

4. Deigið látið hefast í klukkutíma

5. Þegar að deigið er búið að hefast í klukkutíma er því skipt í 4 búta

6. Hver bútur flattur út með kökukefli, þykktin fer eftir því hversu stórir snúðarnir eiga að vera

7. Smá smjör brætt í potti með 6 negulnöglum

8. Blanda kanil og sykri saman

9. Pennsla deigið með smjörinu og strá svo sykri yfir það

10. Rúlla upp deiginu og skera í bita. 

Ég pennslaði þá svo aftur með smjörinu og setti þá á pökunarpappír og inní 180°c heitann ofn (blástur) í 12 mínútur, 

Svona voru snúðarnir þegar að þeir komu úr ofninum

Svo er náttúrulega möst að setja smá súkkulaðikrem á þá.. í það fór eftirfarandi:

100 gr brætt smjör

300 gr flórsykur

50 gr kakó

vanilludropar

4 msk kaffi (eða tvær msk ef þú ert með espressó)

2 msk mjólk

Allt hrært saman

Þessar kíktu í snúðakaffi á Vegelins

xox

Emmý

Eplakakan hennar Ömmu Þóru

Þessa eplaköku elska ég, uppskriftin er frá Ömmu Þóru og hún er unaðsleg. Ég hafði ekki fengið þessa köku í mörg ár en  við mamma ákváðum að gera hana á síðustu helgi. Mér fannst ég sitja við eldhúsborðið á Stillholtinu hjá Ömmu Þóru  þegar að ég tók fyrsta bitann og hún var ennþá jafn góð.

Í eitt stórt fat fer eftirfarandi:

- 350 gr sæt epli (5 epli)

- 150 gr sykur

- 1/4 glas vanilludropar

- 30 tvíbökur

- Jarðaberjasulta

Þar sem að tvíbökur fást ekki í Hollandi prufuðum við mamma að gera heimabakaðar tvíbökur og ég myndi segja að það væri möst í þessa uppskrift. Í 30 tvíbökur fóru:

- 1 dl olía

- 2 dl volgt vatn

- 4 tsk þurrger

- 4 msk sykur

- 1/2 tsk salt

- 1 tsk malaðar kardimommur

- 6 dl hveiti

 Kardimommur malaðar og settar til hliðar

Ger leyst upp í olíu og volgu vatni, rest af hráefni bætt úti og hrært saman. Móta bollur, setja á smjörpappír og láta hefast í 40 mínútur

Svona voru bollurnar þegar að þær komu útúr ofninum (10 mínútur á 225°c)

Bollurnar skornar í tvennt og grillaðar í ofni í 15 mínútur á 175°c. Þær eru látnar þurrkast og kólna í eftirhitanum

Tvíbökur klárar

Eplin skorin og svo maukuð. Sykur, eplamauk og vanilludropar soðin í potti við vægan hita þangað til að þetta verður hlaupkennt. Það tók u.þ.b 20-30 mínútur. Látið kólna.

Svona leit epla sultan út 

Þá voru tvíbökurnar muldar og 3/4 settar í botninn á vel smurðu eldföstu móti

Svo heltum við epla blöndunni yfir tvíbökurnar

Þunnt lag af jarðaberjasultu smurt yfir eplin

Þá var skvísan klár í ofninn

Kakan var sett í 200°c heitann ofn rétt áður en hún er borin fram (sirca 10 mínútur) og hana verður að borða með þeyttum rjóma (eða það finnst Ömmu Em)

xox

Emmý