Aníta Ríkey

Þessi litla vinkona mín er eins árs í dag. Drekamömmunni leiddist ekki að fá að taka svona sykursætar og bleikar myndir af henni 

Emmý

Crispy Indverskur kjúklingur

Í kvöld eldaði ég brakandi stökkan Indverskan kjúkling sem heppnaðist vel, allaveganna svo vel að ég ætla að blogga um hann. Ég eldaði fyrir 5 fullorðna og 4 börn, og notaði u.þ.b. 1,2 kg af kjúkling

Ég byrjaði á að skera kjúklingabringurnar í þrjá bita og búa til jógúrt marineríngu, í hana fór:

1 dós grísk jógúrt (350gr)

2 egg

2 msk mjólk

1 raspað hvítlauksrif

1-2 cm fersk röspuð engiferrót

3 tsk soja sósa

2 tsk Cumin (ath ekki kúmen)

1 tsk Garam Masala

salt og pipar eftir smekk

Svona leit marineringin út, temmilega þykk

Þessu var öllu blandað ljúflega saman og það er fínt að láta kjúklinginn liggja í þessu á meðan að restin er græjuð

Næst á dagskrá er að raða upp 10 brauðsneiðum á plötu og grilla í ofni þar til þær verða gylltar og harðar, þær eru svo látnar kólna og að lokum muldar í matvinnsluvél. Ég blandaði 1 tsk af lauksalti og 1 tsk af hvítlauks pipar við blönduna en það er um að gera að krydda eftir smekk. 

Ég eldaði heima hjá pabba og hann á mjög svo myndarleg kartöflugrös í garðinum. Við tókum að sjálfsögðu upp nýjar kartöflur til að nota með kjúklingnum. Það er náttúrulega smekksatriði hvað fólk vill mikið af kartöflum en ég geri alltaf alltaf alltaf of mikið af kartöflum, þetta er einhver veikleiki sem ég hef erft frá mömmu (og hún frá afa) þannig að ég ætla ekki að gefa upp hvað ég gerði mikið af kartöflum:)

Beautiful

Lang bestu kartöflurnar

Kartöflur

x mikið magn af kartöflum

2 brokkolíhausar

1 chilli (smekksatriði)

2 hvítlauksrif

Ég sauð þær þar til þær urðu mjúkar, þá þurrkaði ég þær og lét kólna aðeins. Næst skar ég niður chilli, mjöööög smátt og raspaði 2 hvítlauksrif útí pönnu með mikið af olíu á. Það lét ég malla í eina mínútu á mjög vægum hita og skar á meðan niður tvo brokkolí hausa. Þeim var svo bætt við chilli/hvítlauksolíuna og látið eldast á vægum hita í 25 mínútur eða þar til brokkolíið varð mjúkt. Næs skar ég kartöflurnar í báta og bætti þeim við brokkolíið og lét hitna

Guðdómlegt chilli af chilli plöntunni hennar mömmu

Á meðan að brauðið var í ofni og að kólna gerði ég Raita sósuna mína sem ég hef ekkert breytt því mér finnst hún unaðslega, uppskriftina má finna HÉR, hún er svo geymd inní ísskáp þar til hún er borin fram.

Kjúklingnum er svo velt uppúr brauðmylsnunum (einn biti í einu), steikt uppúr nóg af smjöri (nokkrar mínútur hvor hlið) eða þar til að skorpan verður fallega gyllt. Bitunum er svo raðað í eldfast mót (sem er smurt með olíu) og látið vera inní 190°c heitum ofni á blæstri í sirca 20 mínútur.. Það er gott að taka einn bita úr og skera í miðjuna til að fylgjast með..

Búið að velta honum uppúr marineríngu og brauðmylnsnum

Steiktur

Kominn úr ofninum

Þetta var svo borið fram með rjúkandi heitu Naan brauði og góðu rauðvíni

xox

Emmý

Drekinn minn er 1 árs

þessa setningu sagði ég við sjálfa mig þegar að ég vaknaði morguninn 18. september s.l. Ég átti mjög bágt með að trúa þessu og þegar að leið á daginn rifjaði ég upp hvað ég hefði verið að gera fyrir nákvæmlega ári síðan. Það er ómögulegt að reyna að lýsa því hversu mikil birta fylgdi þessum litla dreka þegar að ég leit hann fyrst augum klukkan nákvæmlega 16:37 þann 18. september 2012 og hann hefur bætt og kætt líf mitt hvern einasta dag síðan þá.

Að fylgjast með einstakling þroskast og dafna, sem að þú bjóst til, er magnað. Þegar að hann brosir til mín og segir mamma held ég stundum að hjartað mitt ætli að springa af ást og ég er sannfærð um að það sé ekki hægt að elska meira en þetta... þá tekur hann utan um mig og sýnir mér að það er hægt.

Þessi færsla er orðin örlítið dramatískari en ég hafði hugsað mér en þegar að móðurhjartað tekur völdin þá er víst ekkert annað í stöðunni! Við héldum uppá afmælið hans með pompi og prakt og fengum fullt af heimsóknum. Drekinn er svo heppinn að eiga fullt af yndislegum ömmum sem að hjálpuðu okkur og komu með allskonar kræsingar. Ég og mamma skreyttum svo (ég geri mér fyllielga grein fyrir að sumum finnst ég kannski klikkuð að skreyta fyrir eins árs afmæli eeeeeen það verður bara að vera svoleiðis). Ég ætla að deila með ykkur nokkrum myndum frá deginum og set svo inn uppskriftir við tækifæri

Veisluborðið

Óli Dór 1 árs

Drekakaka og dreka veitingar

Hissa á þessu öllusaman

Family

Besta knúsið

xox

Emmý

Afmæliskökur

Ég gerði afmælisköku fyrir Rósu frænku mína í júlí og svo fyrir Morten bróðir minn í dag. Mig langaði til að skreyta báðar kökurnar í sterkum litum og hafa þær svolítið sumarlegar, þess vegna fór ég á netið og skoðaði myndir af allskonar kökum. Ef þig vantar hugmyndir af afmæliskökum, þá gætiru kannski haft gaman af þessari færslu.

Rósukaka

Kakan:

220 gr smjörlíki
400 gr sykur
500 gr hveiti
2 tsk lyftiduft
4 msk kakó
4 egg
1 dl mjólk
vanilludropar eftir smekk

Þetta er einfaldasta súkkulaðikakan mín og ég elska hana. Hún er fljótleg og mér finnst hún æði, ekki of sæt.. bara passleg.

Aðferð
Hræri saman sykur og smjörlíki í dágóða stund (þar til blandan verður fluffy og fín), bæti við eggjunum og hræri vel og lengi (þar til blandan verður ennþá meira fluffy), í aðra skál blanda ég saman hveiti, lyftidufti, og kakó. Bæti helmingnum af þurrefnunum við eggja/smjör/sykur blönduna ásamt hálfum dl af mjólk og hræri í smá stund. Bæti þá við restinni og blanda öllu saman. 

Þetta dugði í eitt Wilton kökuform (fékk mitt í húsasmiðjunni) og í lítið hringlaga form. Þetta bakaði ég við 180°c á blæstri í sirca 35 mín. Ég skar svo út úr hringlaga forminu stilkinn á blóminu og tvö laufblöð neðst.

Smjörkrem

200 gr smjörlíki
500 gr flórsykur
smáááá sítrónudropar
mjólk eftir smekk

aðferð

Blanda þessu öllu saman í hrærivél og hræri lengi (eiginlega því lengur því betra), hafði þetta á full speed í 4 mínútur minnir mig.

Ég skipti svo kreminu í 4 skálar og blandaði fjóra liti

Ég nota alltaf Wilton gel litina og í þessa köku notaði ég Rose í dökkbleika litinn, Leaf Green í græna litinn, Golden Yellow í þann gula og Pink í ljósbleika litinn.

Stútarnir sem ég notaði eru líka frá Wilton og heita
8B fyrir græna litinn
352 inní laufblöðin
230 fyrir útlínurnar
22 inní blómið

Svo notaði ég bara hníf til að setja kremið á hliðarnar.

Mortenskaka

Ég gerði alveg sömu uppskrift og setti hana í tvö hringlaga form og setti blandaða berjasultu á milli (það er líka mjög gott að stappa saman banana við sultuna). Ég gerði sama kremið en í staðinn fyrir sítrónudropa notaði ég vanillu og setti það í fjórar skálar.

Litirnir sem ég notaði heita Leaf Green, Royal Blue, Red Red, og Golden Yellow

Stútarnir sem ég notaði heita
22(gulur), 1M(blár), 1G(rauður), og 2C(grænn)

Morten var sáttur og sæll með kökuna og ég reyndar líka

xox

Emmý

Afmælis-brunch

Ég varð 26 ára gömul þann 30.apríl s.l. og átti góðann dag þrátt fyrir lungnabólgu, hor, og hita. Mamma kom og eldaði mexíkanskan mat fyrir mig og ég fékk fullt af góðum kveðjum, heimsóknum og fullt af pökkum! Í gær bauð ég svo nokkrum góðum vinkonum í brunch á Asparskógana sem heppnaðist með eindæmum vel svo ég ætla að deila með ykkur nokkrum brunch uppskriftum sem ég gerði, ef ykkur skyldi vanta hugmyndir!

Við mamma tókum þetta kannski skrefinu lengra en gengur og gerist í skreytingum, en sumarlegt var borðið!

Jógúrt og Granóla með jarðaberjum, bláberjum, og hindberjum

Ég gerði múslíið kvöldið áður, þetta var sára sára einfalt og ég notaði í rauninni það sem ég átti til og það var eftirfarandi:

-3 dl tröllahafrar

-2 dl sólblómafræ

-1,5 dl heslihnetur

-2 dl kókosflögur

-2 dl möndluflögur

-2 dl rúsínur

-1,5 dl olía

-3 msk hunang

Blandaði öllu sama í skál, sett á ofnplötu og inní 180°c heitann ofn í sirca 20 mínútur, þarf að velta þessu reglulega og fylgjast með að þetta brenni ekki

Ég hrærði saman gríska jógúrt með smá sykri og mjólk og setti svo til skiptis í glas:

-Grísk jógúrt

-Jarðaber/hindber/bláber

-Hlynssíróp

-Múslí

Mímósa

Þetta var dásamlega gott svona á sunnudegi og ég mæli með þessu, reyndar held ég að í mímósu sé bara notaður hreinn appelsínusafi þannig að þetta er mímósa með twisti!

Safi:

-6 appelsínur

-4 epli

-gulrætur eftir smekk (ég notaði í kringum 5 meðalstórar)

-engifer eftir smekk (ég notaði í kringum 2 cm)

-sítróna

Þetta fór allt saman í gegnum safa pressuna góðu, þessu er svo blandað saman við freyðivín (u.þ.b 50/50)

Hleypt egg með reyktum laxi

Ég sá mjög skemmtilega hugmynd á einu af uppáhalds bloggunum mínum, þessu HÉR og varð náttúrulega að prufa. Ég notaði sömu aðferð og er lýst þarna til að elda eggin og það heppnaðist fullkomlega nema að ég þurfti að elda þau í 6 mínútur í 90°c heitu vatni

Ég notaði maltbrauð og á það setti ég:

-Smá smjör

-Rucola

-Reyktan lax

-Hleypt egg

-Kirsuberjatómatar

-Salt/Pipar

Þetta var ótrúlega gott, eggið og reykti laxinn eru virkilega góð blanda

Skálað

Diskurinn

Amerískar pönnukökur

 Ég hef bloggað um þær áður, uppskriftina finnur þú HÉR, þær eru alltaf góðar!

Eftirfarandi var líka á boðstólnum:

- Brauð

- Eggjahræra krydduð eftir smekk
- Beikon, eldað á grillinu
- Kartöflur, steikatar á pönnu með salti
- Ferskur ananas, melóna, og mangó

- Túnfisksalat og Rækjusalat ala mamma (Næsta færsla verður tileinkuð þeim, þau eru bæði í miklu uppáhaldi)

Ég ætlaði mér að taka miklu fleiri og betri myndir en við töluðum og borðuðum svo mikið að það gleymdist, þessar myndir verða að duga í bili

xox

Emmý