Drekinn minn er 1 árs

þessa setningu sagði ég við sjálfa mig þegar að ég vaknaði morguninn 18. september s.l. Ég átti mjög bágt með að trúa þessu og þegar að leið á daginn rifjaði ég upp hvað ég hefði verið að gera fyrir nákvæmlega ári síðan. Það er ómögulegt að reyna að lýsa því hversu mikil birta fylgdi þessum litla dreka þegar að ég leit hann fyrst augum klukkan nákvæmlega 16:37 þann 18. september 2012 og hann hefur bætt og kætt líf mitt hvern einasta dag síðan þá.

Að fylgjast með einstakling þroskast og dafna, sem að þú bjóst til, er magnað. Þegar að hann brosir til mín og segir mamma held ég stundum að hjartað mitt ætli að springa af ást og ég er sannfærð um að það sé ekki hægt að elska meira en þetta... þá tekur hann utan um mig og sýnir mér að það er hægt.

Þessi færsla er orðin örlítið dramatískari en ég hafði hugsað mér en þegar að móðurhjartað tekur völdin þá er víst ekkert annað í stöðunni! Við héldum uppá afmælið hans með pompi og prakt og fengum fullt af heimsóknum. Drekinn er svo heppinn að eiga fullt af yndislegum ömmum sem að hjálpuðu okkur og komu með allskonar kræsingar. Ég og mamma skreyttum svo (ég geri mér fyllielga grein fyrir að sumum finnst ég kannski klikkuð að skreyta fyrir eins árs afmæli eeeeeen það verður bara að vera svoleiðis). Ég ætla að deila með ykkur nokkrum myndum frá deginum og set svo inn uppskriftir við tækifæri

Veisluborðið

Óli Dór 1 árs

Drekakaka og dreka veitingar

Hissa á þessu öllusaman

Family

Besta knúsið

xox

Emmý

Sumarsalat

Ég skil hreinlega ekki að ég sé ekki búin að skrifa um þetta salat áður. Ég get ekki talið hversu oft ég hef eldað það en uppskriftin er frá vinkonu mömmu. Þetta er eins einfalt og það gerist, fljótlegt og unaðslega gott, sérstaklega þegar að sólin skín

Það skemmir líka ekki hvað salatið er fallegt á litinn

Kjúklingasalat fyrir 3-4

- 3 kjúklingabringur
- 1 rauð papríka
- 1 stórt avókadó
- 1 þroskað mangó
- 1 askja jarðaber
- spínat
- 3-4 msk mango chutney
- 1 poki furuhnetur
- 1 hvítlauksrif
- olía

Aðferð

1. kjúklingabringur eru steiktar á pönnu uppúr olíu og hvítlauk (ef ég er að flýta mér þá sker ég kjúklinginn áður en ég steiki hann)
2. Á meðan að kjúklingurinn steikist þvæ ég spínat (það má vera hvaða salat sem er), sker papríkuna, jarðaberin og mangóið og set í salat skál
3. Þegar að kjúklingurinn er nánast eldaður þá bæti ég 3-4 msk af mango chutney á pönnuna og læt malla í 5 mínútur við lágan hita
4. Þegar að kjúklingurinn er alveg eldaður tek ég bringurnar, sker þær í þunnar sneiðar og læt kólna aðeins.
5. Bæti furuhnetunum við mango chutneyið sem er eftir á pönnunni og hita aðeins
6. Sker niður avókadó í salatið
7. Bæti kjúklingum við salatið og að lokum furuhnetu/mango chutney sósunni

Svo er algjörlega nauðsynlegt að fá sér hvítvínsglas með þessu 

Drekinn fékk barnaútgáfu af salatinu 

Ég steikti smá kjúkling uppúr kókosolíu, skar hann smátt ásamt jarðaberjum, mangói og avókadó. 

xox

Emmý

Grillaður lax í sumarbústað

Helginni eyddum við í sumarbústað með góðum vinum, góðum mat, og góðu víni! Ég elska elska elska að fara í sumarbústað, sérstaklega þegar að allt er orðið grænt, lyktin af birkinu er sterk og maður heyrir fuglasöng þegar að maður kemur út á pall á morgnanna. Þessi bústaður var undir Hafnarfjalli en ég hef sjaldan upplifað eins mikið logn á Íslandi, believe it or not.

Anna Lea, Heiður Dís, Ólafur Dór og Marvin Gylfi, stillt og prúð að pósa

Þessi róla vakti mikla lukku

Á laugardeginum grilluðum við lax sem að heppnaðist mjög vel. Við marineruðum laxinn í sítrónupipar, salti,appelsínu og sítrónu berki. Þetta var i fyrsta skipti sem ég smakka svoleiðis og mér fannst bragðið virkilega ferskt og gott.

Með laxinum gerðum við salat, grillaðar kartöflur og einfalda hvítlaukssósu

Hvítlaukssósa

50/50 majones og sýrður rjómi (ég notaði reyndar gríska jógúrt í staðinn fyrir sýrða rjómann og það kom vel út)

1-2 hvítlauksrif
sítrónusafi eftir smekk

salt og pipar
Kjötkraftur

Ég notaði sirca 100ml af majonesi og 100 ml af gríska jógúrtinu og hrærði saman við það 2 hvítlauksrifum, salt og pipar og smá sítrónusafa. Ég leysti svo hálfan tening af kjötkrafti í heitu vatni og bætti því við sósuna. Það er mjög gott að láta hana standa í nokkra tíma inní ískáp áður en  hún er borin fram.

Marvin Gylfi , Hjalti og Þórdís

Það var ótrúlega gott veður þó svo að það væri ekki mikil sól

Rólustemming

Þeir gerast ekki mikið sætari með svona blá augu

Heiður Dís, Fedda og Anna Lea - sætastar

Svo hélt ég smá matarboð í síðustu viku fyrir nokkrar vinkonur, afraksturinn er hægt að sjá í sunnudags mogganum sem kom á laugardaginn :)

xox

Emmý

Barnamatur #2

Nú er drekinn minn rúmlega 8 mánaða og matarvenjurnar aðeins farnar að breytast svo ég ákvað að koma með annað blogg um barnamat. Geri mér ennþá fyllilega grein fyrir því að fólki þykir þetta misskemmtilegt en þetta gæti þó gagnast einhverjum. Fyrra bloggið finnur þú HÉR

Ólafur Dór borðar nánast allt sem ég gef honum og finnst allt gott, ég hef tekið eftir því að nokkrir "réttir" eru í meira uppáhaldi en aðrir og ætla því að deila uppskriftum ef einhverjum skyldi vanta hugmyndir, ég set reyndar ekki inn magn þar sem að það er svo ofboðslega misjafnt hvað börn borða mikið.

Kjúklingur með epli og gulrótum

Þetta er sáraeinfalt, ég steiki á pönnu kjúkling, gulrætur og eplabita. Ég nota stundum ólívu olíu og stundum kaldpressaða kókosolíu. Ég byrja á að steikja gulræturnar í nokkrar mínútur , set svo kjúklinginn og að lokum eplin. Þetta mauka ég svo gróflega eða sker í litla bita

Spaghetti bolognese

Ég steiki á pönnu papríkur, gulrætur, sellerí, tómata og hakk þar til grænmetið fer að verða mjúkt. Sýð spaghetti eða pasta. Mauka þetta svo allt gróflega eða sker í litla bita

Drekinn í action í morgun, þessa dagana er lang skemmtilegast að týna hluti uppúr kassa, láta mig raða þeim aftur ofaní og leikurinn er endurtekinn...

Kjúklingur með perum og kartöflum

Kjúklingurinn hitaður í ofni (ég geri þetta þegar að ég hef gert heilann kjúkling), sýð kartöflur og tek hýðið af peru. Mauka þetta svo allt saman eða sker í litla bita

Skorið grænmeti

Það er ekki lengur vinsælt að fá maukaðann mat eins og fyrir nokkrum mánuðum (nema í morgunmat þá vill hann hafragraut með maukuðum perum og eplum) Núna vill hann helst týna sjálfur uppí sig matinn en honum finnst líka í góðu lagi að fá hann gróflega maukaðann og þá getur hann tuggið bitana. Það er því vinsælt að fá allskonar í bitum eins og t.d. avókadó, tómata, sætar kartöflur, gulrætur, kartöflur, blómkál. Hann fékk líka að naga maísstöngul um daginn og það vakti gífurlega mikla lukku.

Bláberja og banana grautur

Jú honum finnst reyndar tveir grautar góðir, hafragrauturinn og þessi. Ég set botnfylli af vatni í pott, bæti við bláberjum og sýð þar til að berin verða mjúk og vökvinn vel fjólublár. Þá set ég vatnið og berin, banana og smá haframjöl í blandara og mauka vel. Það er samt eins gott að hafa barnið í hlífðarbúnað og helst þann sem að gefur honum grautinn líka...

Fiskur og kartöflur

Þetta er líka í mjög miklu uppáhaldi og hann gæti borðað endalaust af þessu. Ég hef gefið honum lax, steinbít, bleikju og þorsk. Stappa því saman við kartöflur og smjör (augljóslega vel ég eina fiskitegund í einu :).

Þetta barn virðist ætla að stækka hratt. Ég man svo vel þegar að hann fékk þennan bol að gjöf, þá nýfæddur og ég hugsaði með mér"hann passar í þetta þegar að hann fer í skóla" en nei hann smellpassaði þegar að ég setti hann í bolinn í morgun

xox

Emmý

8 mánaða

 Í gær voru 8 mánuðir síðan að heimsins fallegasti dreki kom í heiminn og í áttunda skipti tókum við mæðginin myndatöku...

Þegar að svipirnir eru óteljandi er erfitt að velja bara eina mynd...

xox

Emmý

Barnamatur

Eftir að drekinn minn kom í heiminn fór ég að hafa áhuga á ótrúlegustu hlutum. Þar á meðal barnamat! Ég get legið yfir hinum ýmsa fróðleik um næringu ungbarna á netinu og skoðað uppskriftir, þess vegna ákvað ég að splæsa í eitt ungbarnablogg.. ég geri mér náttúrulega fyllilega grein fyrir því að fólki þykir þetta misáhugavert !

Þetta var hráefnið sem ég gufusauð og maukaði í dag. Ég mauka sirca fyrir vikuna og frysti sem gerir þetta mjög auðvelt

- 1 rófa

- 1 sæt kartafla

- 1 epli

- 1 pera

- 1 brokkolíhaus
- 1 blómkálshaus
- 3 gulrætur
- 1 mangó
- 1 banani

- 1 rauð papríka

Drekinn var eingöngu á brjósti þar til hann varð 5 og 1/2 mánaða gamall, þá gaf ég honum að smakka smá graut, næst sætar kartöflur, gulrætur, kartöflur, blómkál, perur og epli. Þegar að ég sá að þetta fór allt saman vel í hann fór ég að gefa honum fjölbreyttara fæðu og mixa hinu og þessu saman

Ég nota þessa græju frá Philips og mér finnst hún snilld

Ég skar allt hráefnið sem ég vildi gufusjóða í nokkuð litla teninga, þannig tekur það styttri tíma

Ég hreinsaði fræin úr rauðu papríkuni og sauð hana í heilu lagi í smá tíma (tók samt lengri tíma en mig grunaði) eða þar til að hýðið var farið að losna aðeins frá, þá setti ég hana í kalt vatn, tók hýðið af og hún var reddí.

Fyrst gerði ég einfalt gulróta og rófu mauk

Þetta er mangó og banana mauk, ég tók hýðið af mangóinu og banananum og setti þetta svo í mixerinn í smá stund, mér skilst að það þurfi ekki að sjóða mangóið, sérstaklega ekki þegar að börnin eru orðin sjö mánaða gömul (eins og drekinn)

Þetta er blómkál, brokkolí og sæt kartafla

Epli og pera, ég sýð bæði eplið og peruna í smá stund áður en ég mauka það, en hef lesið mér til um að þess þurfi ekki eftir 6 mánaða aldurinn

Sæt kartafla, blómkál, brokkolí, og rauð papríka

Svo geri ég oft avókadó og banana, stappa það bara saman, þarf ekkert að sjóða eða mauka.

Ég gaf honum fyrst að smakka graut frá Holle og eftir að hann varð sex mánaða hef ég gefið honum hafragraut (líka frá Holle) í morgunmat, ég blanda hann alltaf með ferskum ávöxtum.

Mynd af google
Ég hef notað þessa olíu með matnum hans, hún er frá Holle og sérstaklega ætluð ungabörnum frá 4 mánaða aldri og tryggir að börn fái nægilegt magn af fitusýrum. Ég set 1 tsk út í grænmetis og ávaxta maukið. Ég nota hana ekki með avókadói

Ég keypti svona sniðug ílát hjá Ólavíu og Óliver. Þæginleg stærð á þessu, hægt að frysta, setja í örbylgjuofn og auðvelt að taka með ef maður er að fara eitthvert

Þetta eru sveskjur og apríkósur. Mjög auðvelt að gera, tók nokkra sveskjur/apríkósur og setti botnfylli af vatni með. Sauð þar til að þetta varð vel mjúkt og maukaði með vökvanum. Ég hef bara sett 1-2 tsk af þessu útí grautinn/grænmetismaukið hans 

Svo má alltaf nota góðar glerkrukkur, ég set þær samt bara inní ísskáp og nota þá innihaldið innan 2-3 daga

Ég enda þessa færslu á mynd af barninu sem varð 7 mánaða í gær og aldrei að vita nema að ég komi með fleiri barnamatsuppskriftir

xox

Emmý