Granateplasalat- uppskrift

Held það sé tilvalið að blogga um uppskriftina sem birtist í mogganum sl. sunnudag. Ef þig vantar hugmynd af ferskum kvöldverði þá mæli ég með þessu, tekur enga stund og mér fannst þetta æði. Uppskriftin er fyrir 3-4.

Innkaupalistinn fyrir þessa uppskrift er svohljóðandi:

Chilli

Hvítlaukur

Engiferrót

Sítróna

Avókadó

Kál (150 gr, ég nota allt nema iceberg)

Perur

Olía

Dijon sinnep

Hunang

Hvítvínsedik

Granatepli

Möndlur

Parmesan ostur

Kjúklingabringur

1.Það er best að byrja á marineringunni fyrir 2 kjúklingabringur. Í hana fer:

• 1/2 chilli, ég notaði fræin og mér fannst það passlega sterkt, ef þeim er sleppt verður rétturinn mildari.
• 1 hvítlauksrif
• 2 cm engiferrót
• 1 msk olía

Þetta er allt sett í matvinnsluvél og maukað, kjúklingurinn er  skorinn í strimla eða teninga og látinn standa inní ísskáp í 2 tíma (má vera lengur, mjög gott ef þetta er gert kvöldið áður).

2. Næst á dagskrá er dressingin, í hana fer:

• 1 lítið hvítlauksrif (mér finnst ekki gott að hafa of mikið hvítlauksbragð og því notaði ég lítið rif, ef þið eruð mikið fyrir hvítlaukinn, eða eruð kvefuð þá má alveg setja meira)
• 1 til 2 tsk hunang (gott að smakka sig til)
• 1 msk hvítvínsedik
• 5 msk ólífuolía
• 1/2 tsk dijon sinnep
• 1 msk ferskur sítrónusafi
• salt og pipar eftir smekk

Þetta er hrært saman og látið vera inní ísskáp þar til salatið er borið fram.

3. Þá eru perurnar afhýddar og soðnar í sirca 20 mínútur með 4 cm engiferbút, þá eru þær látnar kólna, kjarnhreinsaðar og skornar í sneiðar.

4. Næst eru það möndlurnar, ég notaði möndlur með hýði og ristaði þær á pönnu þar til að ég fann góða möndlulykt. þá skar ég þær gróft niður og hafði þær til hliðar þar til ég raðaði upp salatinu.

5. Þá er kjúklingurinn steiktur á pönnu uppúr smá olíu og látinn kólna aðeins.

6. Svo er bara að skera niður avókadó, þvo kálið og raða salatinu fallega uppá disk eða í skál. Ég setti það í þessari röð:

   kál, kjúklingur, avókadó, perur, fræ úr einu granatepli, möndlur og að lokum sneiddi ég parmesan ost yfir með ostaskera.

Ég læt fylgja með myndband um hvernig má hreinsa fræin úr granatepli, HÉR  getur þú séð það. Svo er nauðsynlegt að bera þetta fram með góðu brauði.

xox

Emmý